Царице моя Преблагая! Надежда моя Пресвятая! Споручница грешных, погибших взыскание! Радость нечаянная во тьме греховней сущим! Заступнице Усердная рода христианского! Не отвергающая всеми презренных и отверженных!
Се бо бедный грешник предстоит пред Тобою, и молит Тя сердцем сокрушенным и изнемогающим! Не остави мене, всеми оставленного! Не забуди мене, всеми забытого! Даждь ми радость, не ведущему радости! О, тяжки мои беды и скорби! О, безмерные моя грехопадения! Яко тьма нощная — житие мое! И несть в сынах человеческих ни единого сильного мне помощи! Ты — единая моя надежда! Ты — единый мой покров, прибежище и утверждение! Дерзновенно простираю к Тебе немощные моя руце и молю: Умилосердися о мне Всеблагая! Пощади, пощади искупленного Кровию Сына Твоего! Утоли болезни многовоздыхающия души моея! Укроти ярость ненавидящих и обидящих мя! Возстави силы моя увядающия! Обнови, яко у орляти юность мою! Не попусти ослабнути в делании заповедей Божиих! Огнем небесным коснися смущенней души моея! Исполни ю веры непостыдныя, любве нелицемерныя, надежды известныя. Да всегда пою и славлю Тебе Преблагословенную миру Заступницу, Покров наш и Споручницу всех нас грешных.
И покланяюся Сыну Твоему и Спасу нашему Господу Иисусу Христу со Безначальным Его Отцем и Жизнеподательным Духом Святым во веки веков. Аминь.
Молитва Царице Небесной из молитвослова епископа Антония Михайловского.